номаҳо
Ҷазоро ба рӯзи қиёмат нагузорем
Рамазон, моҳи шарифи Рамазон, пас аз як моҳу чанд рӯз фаро мерасад. Албатта, омадани он барои мо -мусулмонон ид аст. Моҳи мағфирату раҳмат ва раҳоӣ аз оташи дӯзах мебошад. Бо омаданаш ҳамдигарро ба шодмонӣ табрик мегӯем. Аммо яқин медонем, ки нархи маҳсулот, якбора ба боло меравад. Ба боло мераваду дигар ҳеҷ поён намефарояд. Барои тоҷирон, фурӯшандагон аз ин нигоҳ омадани Рамазон ид мебошад. Медонанд, ки мардум ноилоҷ маҳсулоташонро бо нархи хостаи соҳиби мол мехарад. Аммо медониста бошанд, ки дар ин ҳол барояшон Рамазон моҳи мағфирату раҳмат ва раҳоӣ аз оташи дӯзах нест? Фикр мекунам, ки медонанд, вале ба умеди чизе нестанд ва аз чизе наметарсанд. Воқеан ин ҳақиқате мебошад, ки ба исбот ниёз надорад.
Бе ҳеҷ шак ин гурӯҳ нисбати мо чандин сол боз зулм мекунанд, оре, зулм. Ва инро дигар хел ифода намудан мумкин нест. Мо мехоҳем аз имсол сар карда, пеши роҳи ин зулм гирифта шавад, ҷазояшонро ба рӯзи қиёмат вогузор насозем.
Б. АЙНИДДИНОВ,
шаҳри Қурғонтеппа
Баёни ақида (0) Санаи нашр: 19.06.12 №: 79-80 Мутолиа карданд: 5076
