мулоқотҳо
Пешниҳоди нави Эмомалӣ Раҳмон
ба ЮНЕСКО
Дар шаҳри Рио-де-Жанейрои Бразилия дар доираи иштирок дар конфронси Рио+20 Эмомалӣ Раҳмон, Президенти Тоҷикистон, Ирина Бокова, мудири кулли Ташкилоти Созмони Милали Муттаҳид оид ба маориф, илм ва фарҳанг (ЮНЕСКО)-ро ба ҳузур пазируфт.
Дар ҷараёни суҳбат масъалаҳои ҳамкории пурмуҳтавои Тоҷикистон бо ЮНЕСКО муҳокима гардиданд.
Сарвари Тоҷикистон ба фаъолияти сохторҳои фаръию ниҳодҳо ва муассисаҳои гуногуни Созмони Милали Муттаҳид, аз ҷумла Ташкилоти он оид ба маориф, илм ва фарҳанг дар кишвари худ баҳои баланд дод.
Бахусус, Эмомалӣ Раҳмон аз мусоидати ташкилот дар роҳандозии Ҳамоиши байналмилалии иҷрокунандагони мусиқии классикии "Шашмақом", ворид намудани санаи 1150-солагии асосгузори адабиёти форсу тоҷик Абуабдуллои Рӯдакӣ ба Феҳристи ҷашнҳои ЮНЕСКО, ҷудо кардани маблағҳо барои тадқиқотҳои минбаъдаи илмӣ ва таъмини ҳифзи ёдгориҳои қадимаи Тоҷикистон - шаҳраки Саразм ва Ибодатгоҳи буддоӣ дар Аҷинатеппа ёдовар шуд.
Ҷонибҳо зикр намуданд, ки ҳамкориҳои Тоҷикистону ЮНЕСКО имрӯз фарогири масъалаҳои мубрами глобалӣ низ мебошанд.
Бо ибрози ҳавасмандии ҷониби Тоҷикистон ба тавсеаи минбаъдаи робитаҳо бо ЮНЕСКО, Сарвари давлат Эмомалӣ Раҳмон диққати ҳамсуҳбаташро ба масъалаи ташкил кардани Экспедитсияи сеюми байналмилалии геофизикӣ ба кӯҳҳои Помири Тоҷикистон ҷиҳати омӯзиши ҳолати кунунии пиряхҳо ва тамоюлҳои тағйирёбии таркиби онҳо ҷалб намуд.
Дар робита ба он ки соли 2013 ба узвияти Тоҷикистон дар ЮНЕСКО бист сол пур мешавад, Президент Эмомалӣ Раҳмон аз Мудири кулли ЮНЕСКО Ирина Бокова даъват ба амал овард, ки дар ин сол дар вақти барояш муносиб ба Тоҷикистон сафари дӯстона анҷом диҳад.
Баёни ақида (0) Санаи нашр: 26.06.12 №: 82-83 Мутолиа карданд: 2203
