номаҳо
Зарурат ба нав кардани рақам ҳаст?
Бо нав кардани воситаи нақлиёт, чи шахсӣ ва чи давлатӣ, рақами он низ тағйир меёбад. Дар ин ҳолат металле, ки дар он рақами куҳна сабт гардида, нобуд карда мешавад. Ва баъд бо супурдани маблағи муайян ронанда барои воситаи нақлиёташ рақами нав мегирад. Яъне баъзе аз ҳуҷҷатҳоро низ нав мекунад ва барои онҳо лозим мешавад, ки ронанда боз маблағи муайян бисупорад.
Дар баъзе аз кишварҳои пешрафта механизми иҷроиши ин кор дигар хел аст. Рақаме, ки ба ронанда дода мешавад, то ба охири умр ё худ фаъолияти ронандагии ӯ тағйир намеёбад. Агар ҳам сад бор воситаи нақлиёташро дигар намояд, аз ҳамон як рақам истифода мебарад. Яъне дар ин сурат кору коғазу метал сарфа мегардад. Ва ҳам аз рӯи ин гуна рақам муайян кардани соҳиби воситаи нақлиёт осонтар мебошад. Пас чаро мо дар кишвари худ ин таҷрибаро ҷорӣ накунем?
Мехоҳам масъулон сари ин масъала, ки ба манфиати ронандагону ҳам кишвар аст, нек бияндешанд. Фикр мекунам, ки дар ин маврид маро дуруст мефаҳманд ва пешниҳодамро мепазиранду дар амал ҷорӣ менамоянд. Албатта, ин пешниҳод ба онҳое, ки бо хоҳиши худ рақамашонро иваз мекунанд, дахл надорад.
С. ВАФОЕВ,
шаҳри Кӯлоб
Баёни ақида (0) Санаи нашр: 21.07.12 №: 95 Мутолиа карданд: 5105
