мулоқотҳо
Мулоқот бо Дабири кулли Созмони Паймони Неру
Рӯзи 20 июл Эмомалӣ Раҳмон, Президенти кишвар, Урбан Руснак, Дабири кулли Созмони Паймони Неруро ба ҳузур пазируфт.
Дар мулоқот масоили ҳамкории Тоҷикистон бо ин созмони бонуфузи ҷаҳонӣ баррасӣ шуд.
"Тоҷикистон, ки дорои захираи бузурги энергетикӣ аст, бо ҳамаи кишварҳо ва созмонҳои манфиатдор, аз ҷумла Созмони Паймони Неру ҳавасманди густариши ҳамкорӣ аст", - изҳор дошт дар оғози суҳбат Эмомалӣ Раҳмон.
Урбан Руснак низ дар навбати худ имконот ва иқтидори энергетикӣ, хусусан гидроэнергетикии Тоҷикистонро "бузургу фаровон" номида, изҳор дошт, ки "Созмони Паймони Неру ба рушди ҳамкории судманд бо Тоҷикистон ва мавриди баҳрабардорӣ қарор додани ин потенсиал манфиатдор аст".
Тавре ки Урбан Руснак иттилоъ дод, "Созмони Паймони Неру талошҳои Тоҷикистонро доир ба мавриди истифода қарор додани имконоти энергетикӣ ва таъмини амнияти энергетикӣ дастгирӣ намуда, ба ин кишвар барои беҳсозии самарабахшии шабакаҳои барқӣ, баланд бардоштани савияи дониши мутахассисон ва рушди ҳамкории байналмилалӣ дар ин соҳа кумак мерасонад".
Таъкид гардид, ки имконоти иқтисодӣ, энергетикӣ ва нақлиётию транзитии Тоҷикистон бояд ба нафъи кулли минтақа истифода шаванд.
Бино ба таъкиди Эмомалӣ Раҳмон, "ҳамаи лоиҳаҳои энергетикии Тоҷикистон бо назардошти манофеи тамоми кишварҳои минтақа тарҳрезӣ шудаанд ва мо ҳаргиз аз ғояҳои ба ҳамсоягон зиёновар пуштибонӣ намекунем".
www.president.tj
* * *
Урбан Руснак, Дабири кулли Созмони Паймони Неру, ки баъд аз дидор бо Эмомалӣ Раҳмон, Президенти Ҷумҳурии Тоҷикистон, бо хабарнигорон суҳбат мекард, натиҷаҳои мулоқоташ бо Сарвари давлат оид ба масоили ҳамкории кишвари мо бо ин созмони бонуфузи ҷаҳониро судбахш арзёбӣ кард. Мавсуф изҳор дошт, ки котиботи созмони мазкур аз тарҳҳое, ки мутобиқ ба меъёрҳои байналмилалӣ буда, амнияти энергетики Тоҷикистонро таъмин менамоянд, пуштибонӣ хоҳад кард.
Бино ба гуфтаи Урбан Руснак, дар мулоқот бо назардошти захираҳои фаровони энергетикии Тоҷикистон, зарурати густариши ҳамкориҳои дуҷониба оид ба мавриди баҳрабардорӣ қарор додани он мувофиқа ҳосил шудааст. Мавсуф қавл дод, ки ҷамъи лоиҳаҳои энергетикие, ки дорои аҳамияти минтақавӣ буда, аз сӯи Тоҷикистон тарҳрезӣ мешаванд, Созмони Паймони Неру дастгирӣ хоҳад шуд. Ҳамчунин ӯ изҳор дошт, ки коршиносони ин созмон фазои сармоягузории Тоҷикистонро мавриди омӯзиш қарор дода, доир ба ироаи кумакҳои фаннии худ ҷиҳати коҳиш додани норасоии неруи барқ дар фасли сармо ва ҳамчунон содироти неруи изофӣ ба хориҷи мамлакат тасмим гирифтанд.
Бино ба андешаи Урбан Руснак, кишварҳои Осиёи Марказиро зарур аст, ки аз раванди ҳамкориҳои зичу судовари давлатҳои Аврупо тавассути системаи воҳидии энергетикӣ таҷриба гиранд. Дар ин робита Созмони Паймони Неру ҷиҳати мусоидат дар рушди ҳамкориҳои минтақавии энергетикӣ омода аст. Дар ҳамин ҳол мавзӯи ҳамкориҳо дар бахши навсозии хатҳои интиқол ва таҷҳизоти барқрасонӣ дар Тоҷикистон низ дар миён хоҳад буд.
Бояд иттилоъ дод, ки қароргоҳи Созмони Паймони Неру дар шаҳри Брюссел аст.
Фирӯзи РАҲМОНИЁН,
"Ҷумҳурият"
Баёни ақида (0) Санаи нашр: 24.07.12 №: 96 Мутолиа карданд: 2230
