мулоқотҳо
Гуфтугӯи телефонии Эмомалӣ Раҳмон бо Ҳомид Карзай
25 июл бо ибтикори ҷониби афғонӣ байни Эмомалӣ Раҳмон, Президенти Ҷумҳурии Тоҷикистон ва Ҳомид Карзай, Президенти Ҷумҳурии Исломии Афғонистон, гуфтугӯи телефонӣ баргузор гардид.
Ҷонибҳо дар бораи ҳаводиси дар Вилояти Мухтори Кӯҳистони Бадахшони Тоҷикистон рухдода ибрози назар намуда, таъкид карданд, ки истиқрори вазъ ва таъмини оромиву амнияти мардуми минтақа ҳадафи умда ва асосии саъю талошҳоест, ки дар ин ҷода ба харҷ дода мешавад.
Сарварони ду кишвари дӯст ба мувофиқа расиданд, ки аз ду ҷониб иқдомоти муассире пиёда хоҳанд шуд, то вазъи одии марзҳои Афғонистону Тоҷикистон ва пешгирӣ намудани ҳар гуна аъмоли террористӣ ва зиддиқонунӣ дар он таъмин гардад.
Ҳомид Карзай, Президенти Афғонистон, эълом дошт, ки бо дастури ӯ ба ҷониби сарҳад, алалхусус минтақаи ҳаммарзи Хоруғ, нерӯҳои иловагии низомӣ ва марзбонӣ фиристода хоҳад шуд, то татбиқи ҳадафҳои дар боло баёншуда таъмин гардад.
Сарварони ду кишвар таъкид намуданд, ки байни роҳбарияти Афғонистону Тоҷикистон ва ниҳодҳои марбутаи ҳар ду мамлакат то ҳаллу фасли ниҳоии ин қазия иртиботи доимӣ ва муассир барқарор хоҳад буд.
Баёни ақида (0) Санаи нашр: 28.07.12 №: 98 Мутолиа карданд: 2248
