Сайёҳӣ дар замони муосир ба яке аз соҳаҳои муҳими сиёсати давлатӣ табдил ёфтааст. Раванди он дар Тоҷикистон дар асоси тақозои иқтисоди бозаргонӣ, муносибатҳои сифатан нав нисбат ба ташкил ва омода намудани мутахассисон дар мактабҳои олӣ бомаром идома дорад.
Аз нуқтаи назари таҳлилгарон ва мутахассисони соҳа, пояи асосии инкишофи сайёҳиро омилҳои зерин ташкил медиҳанд: инкишофи иқтисодиёт ва пешрафти иҷтимоӣ, муаррифии кишвар, равобити гуногунсамт бо аҳолии мамлакатҳои дигар.
Сайёҳӣ вобаста ба неруи баланди пурсамари худ қудрати дар як муддати кӯтоҳ қонеъ гардондани талаботи максималии рекреатсионӣ дошта, нисбат ба дигар соҳаҳо афзалиятҳои зиёд дорад.
Ҳоло ҳатто олимон сайёҳии кайҳониро ба муштариён пешниҳод карда истодаанд. Намояндаи агентии сайёҳии кайҳонии «Спейг-Тур» (Олмон) Хартмут Миллер иттилоъ дод, ки лоиҳаи барномаи сохтмони якумин дар ҷаҳон меҳмонхонаи кайҳонӣ тартиб дода шудааст ва то соли 2025 амалӣ хоҳад гашт. 
Бо ибтикори Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон солҳои 2019-2021 - Солҳои рушди деҳот, сайёҳӣ ва ҳунарҳои мардумӣ эълон гардидаанд. Ин амали хирадмандона, баҳри маъруфият пайдо кардани кишвари мо дар арсаи ҷаҳон мусоидат хоҳад кард. Имрӯзҳо дар саросари ҷумҳурӣ олимон, рӯзноманигорону нависандагон ва кулли қаламкашон дар бораи рушди сайёҳӣ асарҳои тоза ба тоза эъҷод менамоянд.  Лозим аст, ки дар таълимгоҳҳо ба масоили сайёҳӣ ва моҳияту аҳамияти онҳо бештар таваҷҷуҳ намоем. Дар макотиби олӣ бояд фаъолияти кафедраҳои сайёҳӣ тақвият ёбанд.
Дар робита ба ин, воситаҳои ахбори оммаи кишвар метавонанд дар тарғиби мавзеъҳои туристӣ саҳми бориз гузоранд. Ҳамин аст, ки мамолики пешрафтаи ҷаҳон барои ҷалби сайёҳон аз ВАО самаранок истифода мебаранд.  Мутаассифона, дар Тоҷикистон рекламаҳое, ки аз тариқи телевизион дар бораи ёдгориҳои таърихӣ пахш мешаванд, ҳатто барои аҳолии дохилӣ басанда нестанд. Зеро, аз рӯи мушоҳидаҳо, қисми зиёди аҳолии мамлакат дар бораи чунин мавзеъҳо маълумоти кофӣ надоранд. Дар сурати надоштани маълумоти зарурӣ мо наметавонем имкониятҳои туристии мамлакатро ба сайёҳони хориҷӣ муаррифӣ намоем.

Саодат МАҶИДОВА,
директори МТМУ № 42 ноҳияи Фирдавсии шаҳри Душанбе