Бо қарори раиси шаҳри Душанбе Рустами Эмомалӣ нақшаи чорабиниҳои Мақомоти иҷроияи ҳокимияти давлатии шаҳри Душанбе оид ба омодагӣ ва таҷлили Рӯзи байналмилалии ҳифзи кӯдакон дар шаҳри Душанбе тасдиқ гардид. Тибқи нақша дар Рӯзи байналмилалии ҳифзи кӯдакон, ки ҳамасола 1 июн таҷлил мешавад, баргузории барномаи фарҳангиву фароғатӣ, ташкили намоиши ҳунару эҷод, мусаввараҳои беҳтарин, дастовардҳои кӯдакону наврасони шаҳр ва озмуни расмкашӣ дар назар аст. 

Ҳамчунин, Мақомоти иҷроияи ҳокимияти давлатии шаҳр бахшида ба таҷлили ин рӯз пахши маводи таблиғотӣ, рекламаҳои иҷтимоӣ вобаста ба ҳаёти кӯдакону наврасон ва таҳияи барномаҳои телевизионию радиоӣ ва мақолаҳо дар мавзуъҳои ҳифзи ҳуқуқи кӯдаконро ба нақша гирифтааст.

 

 

Омодагӣ ба Конфронси дуюми Душанбе дар қароргоҳи СММ 

 

Дар мулоқоти намояндаи доимии Тоҷикистон дар СММ Ҷонибек Ҳикмат бо муовини Дабири кулли СММ оид ба масъалаҳои иқтисодӣ ва иҷтимоӣ Луи Женмин масъалаҳои омодагӣ ба Конфронси дуюми байналмилалии Даҳсолаи байналмилалии амал “Об барои рушди устувор, солҳои 2018-2028” ва иштироки Лиу Женмин ба ҳайси ҳамраиси Конфронс, ки 6-9 июни соли 2022 дар шаҳри Душанбе баргузор мегардад, баррасӣ шуд.

Инчунин, атрофи аҳамияти баргузории Конфронси дуюми байналмилалии сатҳи баланд оид ба Даҳсолаи байналмилалии амал “Об барои рушди устувор, солҳои 2018-2028” ва Конфронси соли 2023 суҳбат доштанд.

Конфронси оби СММ 22-24 марти соли 2023 дар шаҳри Ню-Йорк таҳти раисии Ҷумҳурии Тоҷикистон ва Подшоҳии Нидерланд баргузор хоҳад шуд. Нишасти мазкур баъд аз Конфронси оби сатҳи баланди соли 1977 дар Мар-дел-Плата нахустин Конфронси оби СММ дар чунин сатҳ ба ҳисоб меравад.

 

 

Мулоқот бо ҳайати Бонки осиёии рушд 

           

Дар вохӯрии раиси Кумитаи ҳифзи муҳити зисти назди Ҳукумати Ҷумҳурии Тоҷикистон Шерализода Баҳодур бо Кейт Ҳюз, мутахассиси калони Бонки осиёии рушд оид ба тағйирёбии иқлим, раванди татбиқи лоиҳаҳои муштарак баррасӣ шуда, афзалиятҳои асосии ҳамкорӣ ва маҷмуи тадбирҳои миллии андешидашуда оид ба паст кардани таъсири тағйирёбии иқлим, аз ҷумла саҳми дар сатҳи миллӣ муайяншудаи Тоҷикистон зикр гардид. 

Тавре аз Кумита хабар доданд, ҳамчунин, гуфта шуд, ки корҳо дар самтҳои дигари ҳамкорӣ, аз ҷумла омодагии Тоҷикистон ба Конфронси 27-умин тарафҳои Конвенсияи қолабии СММ оид ба тағйирёбии иқлим, ки моҳи ноябри соли ҷорӣ дар Миср баргузор мешавад, идома дорад.

 

 

Густариши ҳамкорӣ бо филиали Интернюс дар соҳаи маориф

 

Муовини якуми вазири маориф ва илм Ҷамшед Ҷӯразода зимни мулоқот бо директори филиали Интернюс дар Тоҷикистон Рухшона Нажмидинова гуфт, ки филиали мазкур тули фаъ-олият дар самти омода намудани рӯзноманигорон ва баланд бардоштани сатҳи саводнокии расонаии аҳолӣ корҳои зиёд анҷом додааст. Аз ҷумла, дастгирии лоиҳаҳои омӯзишӣ, таъсиси Маркази саводнокии расонаӣ дар факултети журналистикаи Донишгоҳи миллии Тоҷикистон, ифтитоҳи Хонаи саводнокии расонаӣ дар шаҳрҳои Душанбе, Хуҷанд, Хоруғ ва таҳияи дастури таълимии саводи расонаӣ барои омӯзгорону донишҷӯён мебошад. 

Рухшона Нажмидинова гуфт, ки дар оянда таҳия ва нашри китобҳои дарсию дастурҳои таълимӣ барои муассисаҳои таълимӣ ва ташкили курсҳои омӯзишӣ барои омӯзгорону донишҷӯён аз ҷумлаи корҳоеанд, ки бояд дар ҳамкорӣ бо Вазорат роҳандозӣ шаванд.

 

 

Душанбе мизбони конфронси минтақавӣ 

 

Бо мақсади омӯзиши амиқи таҷрибаи давлатҳои Осиёи Марказӣ дар арзёбии манбаъҳои офтобӣ ва бодӣ, ҳамчунин, ҷоннок намудани фаъолияти ин кишварҳо ҷиҳати рушди иқтидори мавҷудаи манбаъҳои барқароршавандаи энергия бо ташаббуси Вазорати энергетика ва захираҳои об дар шаҳри Душанбе 2 – 4 июни соли ҷорӣ конфронси минтақавӣ зери унвони “Дурнамои рушди манбаъҳои барқароршавандаи энергия” баргузор мегардад. 

Бар пояи иттилои Вазорат, ҳадафи аслии ҳамоиш мусоидат ба рушди манбаъҳои барқароршавандаи энергия ва самаранокии энергия дар Осиёи Марказӣ мебошад. 

Дар конфронс ширкати намояндагони созмонҳои минтақавию байналмилалӣ, институтҳои байналмилалии молиявӣ, доираҳои корӣ, ҷомеаи шаҳрвандӣ ва муассисаҳои илмӣ дар назар аст.