Соли 2022 комиссияи доимии амалӣ оид ба корҳои дин, танзими анъана ва ҷашну маросими Мақомоти иҷроияи ҳокимияти давлатии шаҳри Ҳисор ҷиҳати риоя ва татбиқи ҳамаҷонибаи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон» тадбирҳои заруриро рӯи кор гирифтааст. Ҳадафи асосии кори комиссия, бурдани корҳои фаҳмондадиҳӣ миёни сокинон дар бобати даст назадан ба ҳар гуна исрофкорӣ, худнамоию зиёдаравӣ ҳангоми баргузории маросиму маъракаҳо ва ба ин васила, паст кардани сатҳи камбизоатӣ мебошад. 

Юсуфалӣ Ҳасан, мудири бахш оид ба корҳои дин, танзими анъана ва ҷашну маросими Мақомоти иҷроияи ҳокимияти давлатии шаҳри Ҳисор, зимни мусоҳиба тазаккур дод: «Бо мақсади амалӣ намудани талаботи Қонуни Ҷумҳурии Тоҷикистон «Дар бораи танзими анъана ва ҷашну маросим дар Ҷумҳурии Тоҷикистон», дар ҳамбастагӣ бо намояндагони бахшҳои кор бо занон ва оила, ҷавонон ва варзиш, шурои уламо ва дигар масъулони марбута, дар байни сокинони шаҳр, бавижа ҷамоатҳои деҳот, ҳамвора вохӯрию мулоқот мегузаронем. Дар ҳамаи вохӯриҳо моддаю бандҳои қонуни мазкурро тавзеҳ медиҳем. 

Соли рафта дар ҳудуди шаҳр аз тарафи сокинон 4 163 тӯю маърака: 3761 тӯйи домодию арӯсӣ, 229 маросими чил, 173 маросими сол ба қайд гирифта шуд. Маблағи умумии дар маросиму маъракаҳои сокинон масрафгардида, 18 миллиону 613 ҳазору 340 сомониро ташкил медиҳад. Дар якҷоягӣ бо дигар мақомоти дахлдори давлатӣ 1175 рейди назоратӣ доир намудем. Дар рафти санҷиш 13 ҳолати қонуншиканиӣ ошкор гардид, ки дар қиёс ба соли 2021 се ҳолат кам мебошад. Бар зидди қонунвайронкунон парвандаи маъмурӣ тартиб дода, барои чораҷӯӣ ба суди шаҳри Ҳисор ирсол намудем. Онҳо ба маблағи 42 ҳазору 304 сомонӣ ҷаримабандӣ гардиданд». 

Ба гуфтаи Юсуфалӣ Ҳасан, соли гузашта дар байни мансабдорон қонуншиканӣ вобаста ба танзими анъана ошкор нагардидааст. Сокинон низ, моҳият ва мақсади қонунро дар сатҳи олӣ дарк карда, поймолшавии он сол ба сол коҳиш меёбад. Сарфаю сариштакорӣ василаи хуби беҳсозии шароити зисту зиндагӣ барои мардум мебошад.  

 

Ёқуби СОДИҚ, «Ҷумҳурият»